Tékk-inn með Helgu og Örnu

Þetta er persónulegur þáttur þar sem Helga ræðir síðustu mánuði í nýju starfi en hún tók nýlega við stjórnunarhlutverki hjá Isavia. Hún segir okkur frá því hvernig hún sér mannauðsstjórnunin nýtist í nýju hlutverki, áskoranirnar, hvað kemur á óvart og hvað varð til þess að hún tók stökkið.

Herdísi Pálu þarf vart að kynna fyrir fólki í mannauðsmálum og stjórnun. Hún er hafsjór af fróðleik og reynslu og margir myndu segja að hún sé einstaklega lunkin við að sjá hvernig vinnumarkaðurinn mun þróast og hvaða áherslur eru mikilvægar í framtíðinni. Í þessum þætti ræðum við m.a. um símenntun og mikilvægi sjálfsforystu fyrir einstaklinga. Við fundum það að við gátum átt þriggja tíma samtal um þessi málefni og fleiri en við erum ánægð að starta nýjum vetri á þessu skemmtilega samtali.

Í þessum þætti ræðum við við Önnu Signýju sem er framkvæmdastjóri Kolibri. Anna Signý er þaulreynd í að taka tékk-inn þar sem það er eitt af tólunum sem þau nota í hennar starfsumhverfi ásamt mörgum öðrum. Óhætt er að segja að Kolibri er fyrirtæki sem er ólíkt öðrum fyrirtækjum sem við höfum heyrt af og að nálgun þeirra á stjórnun er einstök. Þegar maður heyrir smá um hvernig starfið þeirra er skipulagt þá vakna svo margar spurningar og við leitumst við að svara þeim í þessum þætti. Ekki láta þennan þátt framhjá þér fara!

Helga Jóhanna er stofnandi Opus Futura sem er með nýja nálgun í ráðningum. Hún segir okkur frá lausninni og hvernig tæknin getur stutt okkur í þessu mikilvæga ferli sem ráðningar eru. Við fórum yfir mannlegu áskorarirnar sem oft fylgja og hvað mannauðsfólk og stjórnendur þurfa að vera vakandi fyrir hjá sjálfum sér. Á persónulegu nótunum fór hún yfir hvernig er að vera með nýsköpunarfyrirtæki og þær áskoranir sem hún hefur staðið frammi fyrir í þessu hraða tækniumhverfi.

Harpa Hödd er framkvæmdastjóri Mannauðs- og samskiptasviðs hjá Eimskip. Það sem ekki öll vita er að Eimskip er alþjóðlegt fyrirtæki með starfsemi í yfir 20 löndum, í nokkrum heimsálfum. Harpa segir okkur frá þeim fjölmörgu verkefnum sem falla til á hennar sviði sem hefur nýlega kynnt nýja stefnu fyrirtækisins og eru í miðri innleiðingu á henni. Fyrirtækið er með öfluga leiðtogaþjálfun, arftakaáætlanir og leggur mikið upp úr jöfnum tækifærum kynjanna. Á persónulegum nótum segir hún okkur frá hvernig hún hefur vaxið í starfi, talar um mikilvægi þess að grípa tækifærin og jafnvel skapa þau sjálf. Ekki missa af þessum fróðlega og áhugaverða þætti.

Brynjar Már er mannauðsstjóri Isavia er viðmælandi ékk-inn í þessum þætti og segir okkur frá því hvaða leiðir Isavia hefur farið við að vinna að uppbyggilegri menningu innan fyrirtækisins. Það er margt sem þarf að spila saman þegar kemur að því að breyta menningu í svo stóru og fjölbreyttu fyrirtæki og þá þarf þolinmæðin, ákveðnin og seiglan að vera til staðar. Þetta er fróðlegur þáttur og Brynjar kann svo sannarlega að koma vel fyrir sig orði þegar hann segirokkur frá því helsta.

Við fengum tillögu að þessu skemmtilega umræðuefni og við höfum þó nokkra reynslu af því að vinna að þessu viðfangsefni með teymum. Við segjum frá nálgun Patrick Lencione um árangusrík teymi, eða það sem hann kallar á ensku; Five behaviors of a cohesive team. Fyrir áhugasama þá skrifaði hann bókina The Five disfunctions of a team sem við getum klárlega mælt með og einnig nefnir Arna bókina Overcoming the five disfunctions of a team í þættinum.

Helga Halldórsdóttir er forstöðumaður mannauðs hjá Arion og ræddi við okkur á persónulegu nótunum um hlutverk sitt sem stjórnandi, hvernig hún þróaðist í það hlutverk ásamt því að segja okkur frá þeim spennandi hlutum sem þau hafa verið að vinna að hjá Arion til að byggja upp góða liðsheild og sterka fyrirtækjamenningu. Þetta var virkilega gefandi og fróðlegt samtal og greinilega margt hægt að læra af Helgu og hennar teymi hjá Arion.

Við ræddum við vinkonu okkar Lisu Richardson frá Conscious Consulting um hvernig margt þarf að haldast í hendur þegar kemur að umbreytingarverkefnum. M.a. þarf að stuðla að réttu hugarfari, réttu ferlunum, réttu hegðuninni og því miður er þetta ekki alltaf einfalt. Hér deilir hún reynslu sinni sem ráðgjafi og ræðir þær áskoranir sem hún hefur séð og upplifað í tengslum við umbreytingar hjá fyrirtækjum.

Í þessum þætti áttum við samtal við Ellu Björnsdóttur, stofnanda og ráðgjafa hjá Valhalla. Hún er reyndur leiðtogi og ráðgjafi sem leggur áherslu á mannlega nálgun, sjálfsþekkingu og meðvitaða forystu. Við krufðum aðeins svokallaðar lífsgildrur (blind spots), hvernig þær verða til, hvernig þær hafa áhrif á okkur í daglegu lífi og hvers vegna það er lykilatriði fyrir leiðtoga að vera meðvitaðir um sínar lífsgildrur og vinna með þær. Ella deildi einnig innsýn í bókina sem hún er að skrifa og kemur út á árinu. Bókin er sko komin á óskalistann okkar!